Beste Prins Kubus I en Jeugprins Kay I,

Names mien vrouw en mien kinjer en michzelf: van herte proficicat mit uch Prinssjap biej V.V.De Donderböl. Ut is uch van herte gegund om dit same mit te moge make. Ein geweldig Prinsoetroope, mit sjoon “stoeipoezen” uhum maedjes, in de moulin rouge in de nuuj Donderie, twee nuuj Prinsen in twee sjitterende Prinsepakke, waat wilse nog meer!

Ich wil gaer idderein bedanke dae dit weer meugelijk haet gemaak, same make veer der ein heel sjoon feesje van. Der kômme ein paar heel sjoon weekenden, dink aan de jeugprinsereceptie, de Prinsereceptie, de Prins neudig oet, ut Boerebal en de Bontje Aovend van BAS.

Veural Prins neudig oet zal ein waar happening waere, der zölle veul artiesten aan bot komme, Weej-Dreej, de Toddezek, Maurice Fermont, Sjing Boem, Miesjke en nog veul meer. Dit allemaol op ein aovendj op 27 januari in os eige Donderbölpelies en veural de entree is gratis.

Ich verheug mich noe al op de vastelaovend want mit zo’n gezelsjap kinse neet meer kepot, eine grote raod van elf, twee sjoon gardes, eine geweldige jeug raod van elf, de dames van de raod van elf helemaol in ut nuuj en de Aad Prinse die enthousiast zeen.

Laot de vastelaovend maar kômme veer zeen der klaor veur, en es ich aeve ein momentje veur michzelf höb dan zal ich mich mit eine kubus om de nek, drie daag te gek amesere en mit eine smile op mien gezich, waert deze vastelaovend dan van mich!

Maar ich gaef mich helemaol aan uch en es Vors Rick zegk: miense allemaol eine hele sjoone vastelaovend, maak der ein sjoon feesje van, want det gunne veer idderein, Allaaf